Livianne Farabeau

Tou ti trankil ler nou ariv kot li, bann zanfan ti fek fini manze e pe pran zot repo. Zis de pti baba ki ti la pe ganny berse par son asistan anmezir ki li i ti dan lakwizin pe fer en pti netwayaz. Ankor senplisite i dominen lo sa zil. Kot Madanm Livianne Farabeau i vey zanfan i en zoli lespas an bwa, byen prop, garni par bann zouzou kolore pour bann zanfan.

In fer 28an son lavi pe travay dan lotel me apre en serten letan i ti’n komans fatige avek bann long er-d-tan debout e i ti deside ed son kominote Amitie, Praslin par ofer en servis vey zanfan.

“Avan mon ti sey fer louvraz carer pour enpe letan. Me apre mon ti realize ki mon pa pou kapab sa louvraz carer. Mon ti tann pe dir vin leson pour bann childminder, alor mon ti ale, anmezir ki mon ti ankor pe travay carer. Mon’n vwar ki al dan servis vey zanfan I pli mye pour mwan,” i dir.

I osi fer remarke ki vey zanfan pa’n en zafer nouvo pou li, apart vey son prop zanfan, plizyer lannen pase letan i ti’n fek fini lekol i ti vey en zanfan me apre sa i ti arete.

Farabeau ti anrezistre avek IECD an 2017, depi sa I annan wit zanfan dan swen, aze ant 5 mwan a 3an. I fer sir ki pandan en lasemenn travay I enkorpor bann aktivite pour devlop zot fizik e mantal. I dir nou ki paran I apresye bann aktivite ki I fer ek zanfan.

“La mon annan en pti fiy 2an ki konn tou son bann let alfabet par ker menm bann lobze ki son non i komans ek sa let,” i dir nou avan en gran sourir ki montre son lafyerte.

I dir nou ki i apresye kreasyon IECD me bann lalwa ki i met anplas parfwa I I tro egzizan.

“Bann keksoz ki nou pe ganny demande pour fer anba sa lalwa I plis ki sa ki nou mwayen pe permet avek lapey ki nou ganyen avek bann paran. Menm parfwa letan paran pa oule pey nou, pa toultan ki IECD i kapab entervenir pour ed nou ganny peye,” i rakont nou avek bokou konsern.

Toudmenm i remersye IECD pour bann kour ki in ganny sans swiv e menm sa dis mil roupi led ki permet li aste enpe plis zouzou, sirtou bann pou met deor parey balans ek swimming pool menm si serten in kase.

« Selman i demand ankor, akoz zanfan sa group laz i kas zouzou bokou. Sa pti larzan ki nou gannyen pa ase pour nou fer sa bann depans pou ranplas vitman, » Livianne Farabeau i sizere.

I rakonte ki i’n resaman partisip dan sa kour pour bidze ki’n vreman itil akoz in permet li konnen kote ki i pe perdi plis e esey aranze. I dir ki napa benefis dan vey zanfan me zot fer li akzo zot annan lanmour pour zanfan.

“Napa benefis dan sa louvraz, nou fer li akoz nou kontan zanfan. Nou pran lapenn pour bann paran ki oule al debourye me ki napa landrwa pou kit zot zanfan. Letan ou fini tir ou bann depans napa naryen,” Farabeau i esplike.

I dir ki bokou paran I apros li pour pran zot zanfan pou veye me i dezapwente ki i pa kapab fer li. Vi ki i selman kapab pran 10 zanfan maksimonm, dapre standar nasyonnal. Se bann tel kondisyon ki pe fer li annan dout si i pour kontinyen koman en Childminder.

« Mon pa tro asire  akoz zour an zour bann kondisyon i pli egzizan. I pou tou depan lo mon lanvironnman travay. Me mon kontan zanfan e mon ankor la, » i dir nou.

.tribe-events-excerpt