Messha Pelissier

Lwen dan leo Curio Road ou pou zwenn Messha Pelissier avek son manman, de dimoun kin dedye zot lavi pour travay avek zanfan. Pour ariv kot zot I en leksperyans ki ou pou vwar I inoubliab akoz sa kantite peron ki ou bezwen monte. Me ler ou ariv anler e ou war sa vi ki donn lo Viktorya, ou war lavil an antye, ou bliye si oun mars sa kantite.  E ler ou regard otour, ou pou kwar ki ou dan en lakour lakres telman I ranpli avek bokou kouler e zouzou.

Messha ki annan en zanfan limenm I annan apepre 16an leksperyans koman en Child minder. Se son manman kin enspir li pou pran sa travay e an efe I ti komans travay ek li, e la prezan se son manman ki travay avek li depi ler in anrezistre. I dir enn bann rezon ki in anrezistre zisteman se akoz I remarke ki I ganny bokou led avek IECD, I konen kote I pou ale si I bezwen lasistans e I ganny bokou lankourazman. Dapre standar kin ganny etabli pour Sesel, Messha I vey 10 zanfan depi laz 1an edmi ziska laz lakres. Rezon ki zot pa kapab pran baba ki pli pti I akoz zistans avek semen, I pa fasil pou mont peron avek en baba dan lebra. Toudmenm Messha avek son manman I sey fer lavi zot bann paran pli fasil ki zot kapab lo kote aksesibilite. Zot al zwenn paran kot katedral dan bomaten e retourn avek zanfan aswar menm landrwa. Manman Messha I rakonte ki serten paran I ganny tourdisman telman teren I o, me zot persiste pou anmenn zanfan kot zot akoz zot vreman satisfe avek nivo swen ki zot zanfan I ganyen.

Malgre zistans zot organiz aktivite an deor pour zanfan tel ki piknik e vizit. Ler zot pa dan visit zot kot lakour pe zwe swa lo balans, lo gliswar, lo bouncing castle, dan swimming pool oubyen zot pe fer zot pti leson. Apre ki zot in depans tou sa lenerzi byensir zot bezwen manze pou reganny lafors. Messha I ofer zanfan dezennen, juice ek delo, e I dir ki son bann zanfan I kontan manz bokou legim ek fri donk I fer sir ki I toultan annan dekwa a zot laporte.

Parey dan tou domenn lavi I annan bon kote ek kote ki mwen bon. Messha I akonte ki son pli gran defi I ki parfwa serten paran pa arive pey a ler oubyen pey antye ler in ariv ler, e sa parfwa I met en pti pe dezord dan son plan travay. Toudmenm I apresye ki menm si zot pa kapab donn tou zot fer konnen e zot donn sa ki zot pers I permet. Messha I dir ki son lafwa dan son Kreater ki donn li kouraz e lasazes pou kapab kontinyen malgre bann lobstak parey.

“Mon bann zanfan I egey mwan bokou, zot kontan repete, ou bezwen veye ki ou dir! Imite osi parey!” Messha I akonte, I dir ki I kontan son desizyon pou vey zanfan a plen tan, “ou lanmenm kot lakaz, ou ganny sans fer bann pti keksoz ler zanfan pe dormi”. Parey serten lezot Childminders li osi in fer serten lazisteman avek son landrwa pou rann lavi zanfan pli an sekirite e konfortab. In met tiles antye deor kot zanfan I zwe, sa pour fasilit netwayaz, e in fer en baraz dibwa kot bann pilye pangar marmay in pas atraver e ganny dimal. Messha I rakonte ki pour fer sa bann tiles ariv ziska kot li in bezwen servi sawa akoz transpor pa arive kot son lakour.

Pour ou ki pankor deside si ou pou vey zanfan, Messha I konsey ou pour anrezistre, “I en tre bon linisyativ sa, ou ganny proteze anba lalwa, ou benefisye avek bokou training e osi en lasistans finansyel avek gouvernman.” Manman Messha ki osi son asistan I azoute ki avek bokou pasyans e lanmour pour zanfan I pa difisil “Selman marmay konmela I annan en gran diferans avek marmay lontan, si ou kapab adapte napa problem.”

“Ou satisfaksyon avek zanfan I ler zot ankor mazin ou ler zot pli gran” Messha I dir “nou al kot legliz toulezour e tanzantan enn I vin vwar nou laba. I annen enn I pa ti oule al legliz ler I ti vey kot nou, me ler I tin al lekol toulezour I ti oule son manman I anmenn li legliz pou vin war nou!” Bann pti souvenir ki Messha san dout pou garde pour bokou letan.

.tribe-events-excerpt