Odile Freminot

“Se apre ki mon ti’n ganny mon dezyenm zanfan ki mon ti deside aret travay lotel pour ekip zot. Zot dir ki dile tete i pli bon. Mon zanfan pa ti le dile bwat alor mon ti reste avek li pour donn li sa pli bon swen. Apre sa mon vwazen ti anmenn son zanfan pour mwan veye e avek letan lezot in vini,’’Odile Fremino ki annan 42an i rakonte.

I annan 15 an depi I pe Pratik sa metye. I telman kontan zanfan ki in deza annan ziska 22 zanfan pour veye li tousel. I pa ditou en latas fasil sa !

Depi ki in anrezistre an Zanvye 2017, Odile Freminot in bezwen redwir lakantite zanfan ki I veye me osi rod led en asistan ki dan son ka se son manman ki ed li. La I annan 10 zanfan aze ant 1an a 3an edmi.

Bann zanfan I konmans vin kot li apartir 7:30 bomaten, apre ki tou zanfan in fini arive zot konmans bann diferan aktivite ziska tar bomaten.

« Apre sa malgre konmela mon ganny problenm ganny transpor, nou fer bann pti vizit dan vilaz kot mon ganny sans montre zot kouler, laform, bann plant e bann lezot lobze otour zot,” Freminot i esplike.

Odile Freminot i panse ki IECD I en bon linisyativ me i annan serten rezervasyon.

“Wi, I en bon linisyativ pou bann dimoun ki vey zanfan me selman parfwa bann lalwa i tro ganny enpoze. Mon santi ki zot pa realize ki avek sa ki nou gannyen nou pa pe kapab fer li osi vit,” Freminot i donn plis detay.

Malgre tou sa, i dir ki IECD in ed li pour pli byen vey bann zanfan.

« Sa bann kour i ed ou dan diferan laspe. Lo kote lizyenn e edikasyonnel. Mon’n aprann ki mon pa kapab zis les zanfan asize naryen fer me i annan tout en prosedir pour edik zot e ed zot devlope, » I dir nou.

Lo li menm Freminot ti fer serten modifikasyon ek son lakour lo li menm. Par egzanp i ti met tiles an son lavarang lo li menm. Avek sipor IECD ki’n fourni li avek sa don R10 mil roupi in kapab plafonn son lavarang e aste nouvo zouzou.

« Mon’n fer mon mye avek sa larzan e sa ki’n manke mon’n fer lo mwan menm, »

Anmezir ki i travay avek son asistan Odile I kontinyelman partaz son konesans avek li ziska ki li osi I fini swiv tou bann kour ki IECD i ofer.

« Mon kontan mon louvraz akoz i permet mwan port plis latansyon ek mon lakour.  Mon vey zanfan depi lendi ziska vandredi eksepte zis enn ki pe al lekol lannen prosenn ki mon vey dan sanmdi osi, » i dir « Malgre tou, mon ankor pe gete si mon pou kontinyen akoz parfwa paran i dekouraz ou e parfwa bann lalwa IECD osi. Me selman mon kontan osi regard bann zanfan kot zot pe devlope, konmans koze e tou sa »

.tribe-events-excerpt