Rosalette Benoit

Pou ariv kot Madanm Rosalette Benoit ou pou bezwen pas par semen Dan Lenn, I en pti zistans avek lavil me semen transport I pas lanmenm obor. I en manman en sel fiy 16an me I pe vey zanfan pour 28an, menm depi avan son prop zanfan ti ne.

I dir I ti deside pou anrezistre koman en Childminder akoz ler I ti enformen I ti aprann ki ou ganny bokou lasistans e sipor. Pour le moman I pe vey zis 4 zanfan e normalman I pran zanfan depi laz 3 mwan ziska ki zot al lakres, donk I travay litousel, e ler son fiy I arive sorti lekol I ed li en pti pe par zwe avek zanfan. I dir I ti a voudre kapab prab plis zanfan me I difisil pou ganny en asistan ki fyab alors I bezwen pran zis 5 pour le moman dapre standar nasyonal, malgre ki bokou paran I apros li pou vey zot zanfan.

Zwe I form parti devlopman zanfan, an efe se lafason ki zot aprann pli byen ler zot dan sa group laz, alors se sanmenm ki zot fer plis kot Rosalette. Zot ganny sans zwe lego, sante, zwe kwi manze lo zot pti set zouzou ki Rosalette in rode, poupet e zot osi kapab tay taye deor. E koman nouritir I ofer zanfan dezennen e parfwa si zot napa en pti snacks I donnen, selman paran I anmenn zot goute.

Rosalette I dir ki depi ki in anrezistre I ganny bokou sipor avek IECD. “Avan mon ti ganny problem avek lapey, sa ki ti pey vreman tar, sa ki ti zwe kouk avek ou pou peye, sa ki ti tir son zanfan se ou en semen avan lafendimwan pour li pa pey ou.” Konmela I dir ki sa bann problem koums ai vreman rar akoz I fer sir I gard byen son bann rikord, I kapab fonksyonn byen dapre lalwa. Bann formasyon in ed li pou kapab zize si en paran I pou kapab pey li parey I devret “par egzanp ou bezwen demann li si I travay, ou kapab menm demann en dokiman ki sorti kot son travay, akoz ou bezwen asire ki ou pe ganny peye ou osi, sankwa ou pa pou kapab fer ou louvraz byen. Serten paran I konpran ler ou pe demann sa bann lenformasyon, me serten I kwar ou pe vey son zaksyon , me sa I karakter imen, ou pa kapab lager avek.”

Madanm Benoit li osi in bezwen fer en pti pe laranzman striktirel avek son lakaz pour konfor ek devlopman zanfan. In fer en pti lavarang apar pour zot avek son baro pou fer sir ki zot pa sorti san sipervisyon. Lo miray in met bann pti posters edikasyonel. Me I dir ki I ti a voudre fer en pti bout akote lakaz antyerman pour zot, kot zot ti avan annan zot pti lasal de ben, twalet ek landrwa manze, me pour le moman I pa kapab akoz son mwayen pa ankor permet.

Toudmenm malgre serten defi parfwa e serten move leksperyans avek enn de paran e kanmenm son lebra I tonbe Rosalette I dir I kontan son travay. Son lamour pour sa bann zanfan ki ed li kontinyen “si mon arete, lekel ki pou okip sa bann zanfan? Deza I difisil pou ganny landrwa ki okip zanfan konmela.”

“Mon pou ankouraz bann dimoun ki vey zanfan pou anrezistre koman Childminders, akoz ou touzour ganny lasistans ek sipor avek IECD. Ou ganny sa training osi ki ed bokou, pa reste dan kasyet, al devan.” Selman Rosalette I dir ki bann dimoun ki anvizaze vey zanfan koman en metye I devret asire ki zot annan pasyans e zot kontan zanfan, “ennler ou tann sa bann zistwar kot paran I dir ou tel dimoun ti maltreat zot zanfan, bat zot kriy ek zot, fodre nou pran ka ek nou zanfan e zot a pran ka ek nou plitar.”

.tribe-events-excerpt