Sandra Lesperance

Nou ti ganny akeir par sa zoli lakey sa lavi senp zilwa kot tou i dousman e lavi i ganny viv en zour a la fwa. Anmezir ki nou antre dan sa pti lale Moulinen estate Praslin, byen prop konmsi ti’n fek balye, ou nennen i ganny pirifye avek en ler pli pir ki sa ki ou abitye santi Mahe. Nou ti pe al zwenn Madanm Sandra Lesperance ki pe vey zanfan pour plis ki 10 an.

Apre ki i ti’n bouz dan son nouvo lakaz isi menm Moulinen estate, Baie St. Anne Praslin apre ki i ti’n fek fini ganny son zanfan, Sandra ti deside aret travay lotel pour li vey son fiy.

« Mon ti en waitress avan, mon ti pe fer sa travay pour enpe letan me mon ti deside arete pour mwan vey mon zanfan akoz mon ti pu nepli ganny mon manman pour ed mwan. Anmenmtan mon ti deside pran detrwa lezot zanfan pour veye pour mwan kapab ganny en saler, » Sandra i rakonte.

I rakont nou ki I pa ti difisil pour li kit son karyer dan tourizm akoz i ti’n grandi dan sa lemonn vey zanfan.

« Mon manman ti toultan vey zanfan. Be mwan kantmenm mon’n travay dan domenn tourizm, mon’n toultan vey zanfan kliyan dan mon letan lib. Parey letan mon ti off, mon ti vey zanfan bann touris ouswa letan zot bezwen lasistans mon al veye. Mon’n toultan kontan vey zanfan, » i dir.

Sandra Lesperance i annan 3 zanfan, son Msye i son asistan e son fanmiy i viv byen avek bann zanfan ki I okipe. Zot menm mank bann zanfan letan zot pa la.

« Avan mon ti anrezistre an 2016, mon ti annan maksimonm douz zanfan me apre ki mon’n anrezistre mon annan wit zanfan me mon kapab pran maksimonm nef, » i dir.

Zour nou ti pas kot Sandra i ti annan zis de zanfan ek li. Vi ki Praslin i en zil touristik e lotel I landrwa prensipal kot bann zabitan I travay Sandra I dir nou ki laplipar paran i pran konze dan sa letan e zot kit zot zanfan ek zot.

Me letan tou zanfan I la Sandra i dir  ki apard zwe lego, zwe boul, fer legzersis ek lanmen e  aprann sote, zot al fer vizit lo lans  ouswa zot al zwe lo laplenn ou menm fer en pti vire dan transpor. Malerezman Praslin napa servis baby gym ek swimming pool parey Mahe me bann child minder I fer zot prop laranzman.

“Nou napa sa servis Praslin me mon annan mon prop pti swimming pool ki nou gonfle e met deor. Zot zwe ladan letan i fer botan, »

Apard resevwar swen avek plis latansyon ki en servis vey zanfan kot lakour I donnen, Sandra i dir ki paran sorti depi Grand Anse i vin kot li akoz i menm ofer son servis pandan weekend e aswar. Paran i menm ganny sans al travay, al anmize aswar ou menm al vwayaze.

«Mon vey depi lendi ziska dimans, menm konze piblik parfwa. Laplipar bann paran ki annan zanfan kot mwan, zot travay lotel e vi ki mon deza travay lotel, mon konpran zot sitiasyon. Mon fanmiy i ed mwan e kontan letan nou annan bann zanfan ek nou, »

Sandra i admet ki menm si in vey zanfan pour plizyer lannen i’n annan bokou ki in aprann dan bann kour ki IECD in donnen.

« Sa bann kour in ed mwan pour vin pli konsyan e travay dan en fason pli profesyonnel, »

Sandra i dir ki I pa’n bezwen modifye son lakour me in plito servi sa lasistans R10 mil roupi pour aste bann zouzou pour met deor dan zarden.

“ Mon anvi reste koman en Childminder. Mon kontan pou fer li e si tou i al byen mon pou kontinyen fer li,” Sandra i dir nou avek konfidans.

Retourn travay anploye i pa dan son plan me tou I depan lo son kreater, Sandra I reflesir.

.tribe-events-excerpt