POEM by Stanne Samson

Lazournen in konmanse
Partou i trankil
Soley i kares montanny e anons son larive
“Mersi Bondye pour sa nouvo zour”
Dan ou prezans
Tou keksoz i ranpli avek lanmour

Bann pti lavwa i penetre
Enn par enn
Lespri tann e fre
Pare pour aprann e dekouver
Tou mazik
ki egziste dan sa bann liniver

Tre o, leko melodi i rezonnen
“Lalalala”, lanmen i koste
Pour zouir, pour aklamen
I gou, gou, gou
I dou, dou, dou

Get nou pe zwe ansanm
An souriyan, plen avek laganm
Bann pti legren ki pe bourzonnen
Tre byento
Zot a fleri e pran en lot semen

Mon vreman fyer
Ler mon regard zot pe grandi byen
Mersi kreater pour donn mwan sa don presye
Pour tous sa bann pti leker
E atrap sa bann pti lanmen kirye
Mon pou kontinyen pouse pour zot ariv ver lavan
Mon pou kontinyen travay avek devouman
Mon dedye mon leker ek tou mon lafors
Sa i mon rev
Sa i mon komitman!