September 23, 2025
Bonswar tou bann envite distenge (tou protokol obzerve)
Mon bann koleg childminders,
Set avek bokou lazwa ki mon’n aksepte lenvitasyon Lenstiti pour Ledikasyon ek Swen Pti Lanfans (IECD) pour fer en temwayaz lo mon parkour dan servis swen zanfan kot lakour. Mon santi mwan onore e vreman fyer.
Mon oule remersye IECD pour sa privilez ki’n akord mwan dan kad selebrasyon lazournen bann edikater pti lanfans, en levennman tre spesyal e avek bokou lenportans pour nou, bann childminders.
Pran swen avek bann pti zanfan i pa en travay fasil. I enn ki eksitan, ki gard ou lo de lipye e ou lespri toultan alert, kot ou bezwen montre lanmour, pasyans, bon kominikasyon, konfyans dan ou lekor ek en o standar langazman parmi lezot. Ofer en tel servis par kont i osi anmenn bokou lazwa ek satisfaksyon.
Mon ti komans mon parkour an 1995 dan en Day Care ek Preschool ziska 2010. Pandan sa 15 an mon ti eksperyans bokou lakonplisman, fer bokou sikse e osi rankontre pa mal defi. Avek kouraz ek perseverans mon ti reisir sirmont bann lobstak e arive akonplir mon devwar koman en edikater. Mon ti ganny bokou sipor ek lankourazman bann paran ek lakominote an zeneral.
Apre en labsans 8 an, mon ti zwenn IECD pour ofer en servis swen zanfan kot lakour an 2018. Mon ti swiv e konplet avek sikse progranm (PRESET) – sa progranm formasyon lo bann standar nasyonal avan lanrezistreman formel servis avek Lenstiti. Pour mwan sa ti en leksperyans eksepsyonel e inoubliyab. Mon ti kwar mon ti konn tou dan child care, me pa ti leka. Mon ti aprann bokou e pli byen konpran lenportans bann standar e zot lyen direk avek devlopman, proteksyon, swen ek ledikasyon bann pti zanfan.
Avek bokou led ek sipor sorti kot IECD ek bann lazans konsernen, tel ki Lasante Piblik, SFRSA, Zafer Sosyal, mon ti reisir fer laplikasyon e anrezistre mon servis an 2020. Sa prosedir kot IECD ti senp e kourt, e manti pa bon, dan mon ka, mon pa ti eksperyans sa zafer monte desann, vir an ron e trenn lipye!
Mon servis i apel ‘Dannies Childminding Centre’ e i sitye ‘Corgat Estate’, Mont Fleuri
Pandan sa dernyen 6 an, mon’n devlop sa lanmour ek komitman anver sa vokasyon nob. Mon ti kwar training ti’n fini avek IECD. Prezan ki ti annan! Apre lanrezistreman ofisyel mon servis, mon’n ganny loportinite pour partisip dan plizyer sesyon formasyon ek devlopman profesyonnel kontini pour childminders. Tousala, in donn mwan plis konesans ek bagaz neseser lo swen, lasante ek ledikasyon pti zanfan, e permet mwan reste azour avek bann devlopman lo nivo Lenstiti e globalman.
Par egzanp mon’n swiv:
- Sesyon avek SACOS lo lasirans pour child care;
- Sesyon avek SRC lo lanrezistreman biznes e rezim taks;
- Sesyon avek Labank Devlopman lo bann mwayen finansman pour biznes child care;
- Sesyon lo Fon Pansyon e bann benefis ki childminders i kapab gannyen;
- Sesyon lo nouvo platform nimerik pour lasistans finansyel (CBISS) an liny avek lazanda nimerizasyon gouvernman. Sa i zis pour nonm enn de……
Si i’n annan en keksoz ki IECD in fer, k’in fer mwan vreman kontan, se lentrodiksyon servis nimerik ek platform CBISS. Sa linisyativ in vreman fasilit lavi nou bann childminders. Paran ensi ki nou menm, nepli bezwen ranpli sa ta papye ek form lanrezistreman. Konmela mon ganny mon payrol lasistans finansyel par imel e mon bann paran i fer zot transaksyon lo platform CBISS online, lo website IECD. Vreman, nou pa’n ganny kit ater dan sa lemonn teknolozik ki pe evolye tre rapidman. Mon’n aprann i annan ankor en servis nimerik ki pe vini ver lafen lannen. Mwan mon’n pare pour sa!!
Pandan mon parkour pran swen avek pti zanfan, mon’n osi aprofondir mon konesans dan domenn ‘stimilasyon e preanprantisaz’. Sa i relye avek sa nouvo progranm preaprantisaz pour zanfan 0-3 an ki IECD in devlope e lanse resaman. Mon’n ganny bokou sipor dan lenplimantasyon sa progranm e osi bann materyo pour asiste bann zanfan dan zot devlopman. Konmdir Vurna, sa progranm i ‘topinana’ e deza mon pe war son lenpakt lo devlopman bann zanfan. Mon konvenki i ava ede pour anmenn plis lefikasite ek sikse dan nou sistenm ledikasyon, pli tar!
Atraver bann loportinite a nou dispozisyon pour ogmant nou konesans e devlop plis konpetans – mon’n partisip dan en lot progranm formasyon amitan, inisye par IECD, an kolaborasyon avek Lenstiti Formasyon Bann Ansennyan (SITE) e SQA, ki apel ‘Recognition of Prior Learning’ (RPL).
Sa progranm i rekonnet an grann parti, e donn merit leksperyans ek domenn pratik dan servis swen pti zanfan. Mon ti konplete an Novanm 2022 avek en sertifika dan ‘Child Care Development’. Mon vreman fyer mon lakonplisman akoz sa kalifikasyon i annan menm valer avek sa ki SITE i ofer dan son progranm formasyon formel.
Mersi IECD pour ou vizyon avangard ek sipor ekselan! Nou pa kapab demann plis. YOU ARE THE BEST!!
Ser koleg, napa byen byen pei ki zot bann childminders i ganny sa kantite loportinite koumsa – alor mon ankouraz lezot childminders ki ankor pe fer desizyon, pour zwenn sa progranm pour zot prop devlopman profesyonnel e mon osi lans lapel avek bann ki pa ankor anrezistre zot servis pour swiv progranm formasyon PRESET e avans devan. En childminder i fer bokou me, avek plis bagaz dan konesans ek pratik atraver formasyon ek devlopman profesyonnel i kapab fer bokou plis.
Mon bann frer/ser koleg Childminders, zot pou dakor avek mwan ki IECD, anba direksyon Madanm Choppy, nou’n benefisye en kantite e akonpli bokou. Sa ki pli zoli, se avek IECD nou pa pe aret la ! The sky is the limit !! An retour, nou bezwen pran nou travay tre serye, enplimant e mentenir en o nivo dan bann standar e etablir pli bon pratik pour devlopman entegral nou bann pti zanfan.
Lo lapar bann Childminders, mon oule eksprim mon senser lapresyasyon ek rekonesans pour IECD ek son bann staf vreman devoue ki annan en pasyon pour zot travay, e bann lazans kle pour zot sipor kontinyel. Mon osi rekonesan anver bann paran ki annan ase konfyans dan nou pour konfye ledikasyon, swen ek sekirite zot zanfan dan nou lanmen. Zot sipor i fer en gran diferans dan nou servis.
Mon oule osi dir en gran mersi pour bann ki’n dedye bokou zefor ek letan pour organiz sa rankont spesyal pour nou. Lentrodiksyon sa linisyativ Lekselans dan Servis Swen Zanfan i montre ki nou servis i ganny rekonnet e valorize. Sa i pou kontribye pour elev servis swen zanfan e met li lo en lot nivo. Childminders i vreman ganny apresye isi Sesel e pour sa, annou donn zot tou en gro laplodisman.
Ser koleg, ozordi i nou lazournen. Dan servis ki nou ofer, nou tou nou en gannyen e pe fer sikse dan nou prop fason. Alor annou rezouir e selebre nou lakonplisman!
Mersi pour ekout mwan.
